محمد هشام مُحرم يكتب: "هات الشريط من أوله"

هقولك الحل،علاج سحري و لازم تعمله،هات الشريط من أوله

لما تنسي ، حُط صورك في الميدان قدام عنيك،تلقي نفسك تبتسم ، تفتكر أيام جميلة أيام أكيد غالية عليك 

تفتكر نص الرغيف اللي إداهولك حد كنت ماتعرفوش 

تفتكر قعدة رصيف تفتكر أطيب وشوش ، ضحكتك من القلب طالعة لما قالوا عنك بلطجي و بتاع خراب ، رفعتك للجزمة لما سمعت من حسني الخطاب

فاكر ؟ لما كنت خلاص بتزهق و ابتديت تفقد أمل ؟ 

مرة واحدة رجع الأمل مع دخول أول جمل ، هفكرك و أديك أمارة ، فاكر انت إزاي وقعت وهما خدوك قصر الدوبارة ؟ فاكر ؟لما شوفت كلاب الحاكم بينفذوا في الشهيد  حكم بالإعدام فاكر يومها إزاي حلفت مش راجع إلا لو سقط النظام ؟ 

ولا بلاش. بعد الثورة كان فيه إعتصام،كُنت قاعد بتدندن " صباح الخير علي الورد اللي فتح " دخلوا العسكر ضربوا فيك و رجعوا قالوا رصيدنا يسمح.

طب فاكر لما نزلت من بيتكوا كما المجنون لما بس سمعت " ضربوا أهالي الشُهدا " في مسرح البالون .وبرضه فاكر إحساسك في العباسية أكيد لما قتلوا العسكر يوميها أول شهيد،ابتدي يومها الهتاف يعلي أكتر فأكتر " يسقط يسقط حكم العسكر ". 

ولا لما في الميدان لقيت نفسك لحالك واقف في وش النار و اللي كُنت فاكره صديق شاف الكراسي باعك و خانك، و لما صاحبك كلمك قالك مينا مات. تعالي علي ماسبيرو جريت روحتلوا  من سُكات،فاكر مين اللي رد غيبة ست البنات ؟ افتكرت ؟ عرفت انك و اللي زيك للثورة جنود؟ تشهد عليك شوارع مجلس الوزرا و حيطان محمد محمود. طب فاكر لما في يوم واحد راح منكوا 72 شهيد فاكر شيلة اخواتك لاخواتك جثث راجعين من بورسعيد ؟عُمر موتهم ما كان سحابة صيف مانتاش ناسي جيكا ولا الحسيني ضيف. دمعك محبوس في العينين و انت عارف ان جندي و كريستي ماهُماش أخر شهيدين فهو حل من إتنين يا ترضي تنسي اللي فات و تكمل عيشة في الفساد. يا تروحلهم و تجمعك صلاة جماعة ورا حبيبك الشيخ عماد . 

نعم يا صديقي تلك كانت الصورة الكاملة 

 فقط تذكر دائمآ أت ميدانك ظل 18 يومآ مثالآ حيآ للمدينة الفاضلة